"Qurban Qurbanov "Sabah"ın qələbəsinə kölgə saldı" - Maqsud Adıgözəlov
“Sabah”ın prezidenti Maqsud Adıgözəlov açıqlama verib.
Sportal.az xəbər verir ki, klub rəhbəri Misli Premyer Liqasının 22-ci turunda "Qarabağ"la (3:3) heç-heçə oynaması və görüşün sonunda baş verən hadisələri şərh edib:
“Əvvəlcə onu deyim ki, həqiqətən də möhtəşəm oyunun şahidi olduq. "Sabah" və "Qarabağ" arasındakı matç parlaq, emosional və yüksək keyfiyyətli alındı. İki güclü komanda qarşılaşdı, yüksək temp və əsl futbol var idi. Hesabda 3:0 irəlidə idik, amma rəqibimiz müqavimət göstərməyi bacardı. Bu cür hadisələr futbolun ayrılmaz hissəsidir.
Həmçinin hər iki komandanın azarkeşlərinə təşəkkür etmək istərdim. Atmosfer möhtəşəm idi və yeni azarkeş rekordu da qırıldı. Bu, Azərbaycan futboluna marağın artdığının daha bir sübutudur. Buna görə də diqqətin bu cür matçda sonlarda yaşanmış xoşagəlməz hadisəyə çevrilməsini istəməzdim”.
Adıgözəlov matçın son dəqiqələrində baş verən dava ilə bağlı isə bunları deyib:
“Bəli, matçın sonunda emosional vəziyyət yarandı. Köməkçi məşqçimiz hakimlə danışdığı vaxtda, “Qarabağ”ın ehtiyat oyunçular skamyasından bir nəfər ona sakit olmağı tapşıran jest etdi. Buna cavab olaraq məşqçimiz emosional və yersiz bir jest etdi. Təbii ki, bunu etməyə haqqı yox idi.
“Sabah” futbol klubu bu cür davranışı qəbuledilməz hesab edir. Bu, bizim adət-ənənələrimizə, mədəniyyətimizə və dəstəklədiyimiz dəyərlərə uyğun gəlmir. Onunla söhbət aparmışıq. Baş verənləri yalnız futbola xas olan emosiyalara əsaslanaraq haqlı çıxarmadıq. Əksinə, məşqçimiz təkcə kənarda deyil, həm də mətbuat konfransında üzr istəməyi zəruri hesab etdi. Hansı kluba qarşı belə bir hadisə baş verməsindən asılı olmayaraq, biz də eyni addımı atardıq. "Qarabağ" nümayəndələri bu hadisəyə diqqət yetirməsəydilər belə, üzr istəyərdik. Üzr istəmək mədəniyyəti statusdan, ləyaqətdən və ya adlardan asılı deyil.
Yeri gəlmişkən, üzr istəmək mədəniyyəti ilə bağlı danışırıqsa, xatırlatmaq istəyirəm ki, 2023/2024 mövsümündə, "Qarabağ"-"Sabah" matçında rəqib son saniyələrdə qol vurdu və “Qarabağ”ın oyunçularından biri ehtiyat oyunçular skamyamıza jest etmişdi.
Bundan əlavə, ölkə kubokunun finalının ardından hörmətli Qurban Qurbanov oyundan sonrakı müsahibəsində “Sabah”ın qələbəsinə kölgə saldı və dolayı yolla onun şəffaflığını şübhə altına aldı. Bu sözlər sonradan emosiya ilə əlaqələndirildi. Eynilə “Qarabağ”ın oyunçularından birinin qol vurduqdan sonra qapıçımızın qarşısında ekzotik rəqsi də var idi. Məncə, bu da ənənələrimizə uyğun deyil. Təəssüf ki, dostlarımız o vaxt üzr istəməyi lazım bilmədilər və hər şeyi emosiya ilə əlaqələndirdilər. Üzr istəməmək və ya vəziyyəti gərginləşdirməmək üçün sakit idik, çünki başa düşürük ki, döyüşün qızğın vaxtında bəzən olmamalı şeylər baş verir. Buna görə də, bu dəfəki epizoda belə reaksiya bizi bir qədər təəccübləndirdi.
Mövqeyimiz dəyişməz olaraq qalır: oyuna və rəqibə hörmət və irəliləmək. Gəlin fərdi hadisələrin ümumi mənzərəni kölgədə qoymasına imkan vermədən futbol, matçın keyfiyyəti və çempionatımızın inkişafı barədə danışaq”.
Azerisport.com
